Mae gan y Bwrdd Iechyd ddull eglur ac uchelgeisiol lle mae trawsnewid digidol yn y cwestiwn, a ategir gan arweinyddiaeth gref a chynllun strategol sefydledig. Mae goruchwyliaeth y Bwrdd ar drawsnewid digidol yn effeithiol, ond gallai sicrwydd gael ei gryfhau trwy gyfuno gwybodaeth am ddeilliannau ac effaith ymgysylltu ar draws prosiectau digidol. Er bod y Bwrdd Iechyd yn ymrwymedig i fuddsoddi mewn trawsnewid digidol, fel a ddangosir trwy ei bartneriaeth strategol 10 mlynedd gydag arbenigwr allanol, mae cyllid cyfyngedig yn creu risg i gyflawni blaenoriaethau strategol.

Mae’r Bwrdd Iechyd wrthi’n cyflawni ystod o brosiectau lleol a chenedlaethol, gyda’i fap trywydd trawsnewid digidol tair blynedd yn amcanu at wella deilliannau ar gyfer cleifion, profiad staff, a llywio cynaliadwyedd ariannol. Mae gan y Bwrdd Iechyd hefyd ddull da o werthuso prosiectau digidol a thracio eu manteision.

Mae trefniadau rheoli risg ar gyfer seilwaith digidol a seiberddiogelwch wedi datblygu’n dda, gyda goruchwyliaeth glir. Fodd bynnag, mae trefniadau llywodraethu ar gyfer defnyddio Deallusrwydd Artiffisial ar draws y Bwrdd Iechyd yn dal mewn cam cynnar.

Mae’r Bwrdd Iechyd yn gwneud cynnydd o ran deall a gwella sgiliau digidol trwy hyfforddiant wedi’i dargedu, llwybr sgiliau, a mentrau cynhwysiant digidol. Er gwaethaf y camau cadarnhaol hyn, mae hyder digidol yn amrywio ar draws y gweithlu, ac mae diffyg cynllun gweithlu digidol ar ei ben ei hun yn wendid amlwg wrth i drawsnewid digidol gyflymu.

Mae’r sefydliad yn dangos ymrwymiad cryf i gynhwysiant digidol a gweithio mewn partneriaeth, gan gyfrannu’n frwd at raglenni cenedlaethol a rhanbarthol. Mae ymgysylltiad â staff a defnyddwyr gwasanaethau’n gwella trwy arweinwyr gwybodeg glinigol, hyrwyddwyr digidol, a gweithdai dylunio.