Mae ein hadroddiad, a gyhoeddir heddiw, yn galw ar Lywodraeth Cymru i sicrhau bod ei dull o ariannu cynghorau yn amserol, yn seiliedig ar wybodaeth gywir ac yn rhoi mwy o eglurder i gynghorau ynghylch y cyllid y maent yn debygol o gael yn y dyfodol. 
Mae'r adroddiad Ariannu Cynghorau yn ystyried sut mae Llywodraeth Cymru yn dyrannu cyllid i’r 22 o brif gynghorau yng Nghymru. Mae cynghorau yn dibynnu'n helaeth ar y cyllid hwn i ddarparu gwasanaethau hanfodol i'w cymunedau. 
Mae ein hadroddiad yn esbonio nad yw'r ffordd y mae Llywodraeth Cymru yn dyrannu cyllid bob amser yn helpu cynghorau i gael gwerth am arian. Canfu bod angen amcangyfrifon cliriach ar gynghorau o ran faint o gyllid y gallent ei gael yn y dyfodol i'w helpu i wneud cynlluniau ariannol. Mae'r adroddiad hefyd yn galw ar gynghorau a Llywodraeth Cymru i gynllunio ar gyfer gwahanol lefelau cyllid posibl, fel eu bod mewn sefyllfa well i ymateb pan fydd y lefelau cyllid yn cael eu cadarnhau. 
Nid yw'r fformiwla a'r broses y mae Llywodraeth Cymru yn eu defnyddio i ddyrannu'r rhan fwyaf o gyllid i gynghorau wedi cael eu hadolygu'n llawn ac yn annibynnol ers dros 20 mlynedd. Mae'r adroddiad yn nodi bod rhai dangosyddion a ddefnyddir yn y fformiwla yn dibynnu ar ddata o 1991 a 2001. Mae hyn er gwaethaf y newidiadau sylweddol ledled Cymru dros y cyfnod hwnnw. 
Mae'r adroddiad yn esbonio y gall nifer, dyluniad ac amseriad grantiau greu aneffeithlonrwydd. Weithiau mae cynghorau yn derbyn cyllid yn hwyr yn y flwyddyn ariannol, gan gynyddu'r risg bod penderfyniadau'n cael eu gwneud yn gyflym ac nad yw arian cyhoeddus yn cael ei ddefnyddio yn strategol. 
Mae'r adroddiad yn gwneud pum argymhelliad i Lywodraeth Cymru i wella'r gwerth am arian y mae hi a chynghorau yn ei gyflawni. Maent yn cynnwys adolygu sut mae'n dyrannu cyllid i gynghorau, rhoi mwy o sicrwydd i gynghorau dros lefelau cyllid yn y dyfodol, a gwella sut mae'n rhoi grantiau i gynghorau.