Mae'n hysbys ac yn cael ei drafod yn eang fod gennym boblogaeth sy'n heneiddio yng Nghymru, ond rhoddwyd llai o sylw i'r hyn sy'n digwydd ym mhen arall y sbectrwm oedran, lle mae'r gyfradd genedigaethau yng Nghymru wedi gostwng 19% dros y degawd diwethaf.

Mae hyn o bwys gan y caiff cyfraddau genedigaethau sy’n gostwng effaith ar ysgolion, gwasanaethau mamolaeth, darpariaeth gofal plant, gwasanaethau ieuenctid ac addysg bellach.

Mae'n bwysig i ni gan fod newidiadau demograffig sylfaenol fel hyn yn cael effaith uniongyrchol ar gost ac ansawdd gwasanaethau cyhoeddus.

Buom yn blogio am hyn yn ddiweddar, a dyna pam y daeth hyn i sylw'r BBC.

Mae Deddf Llesiant Cenedlaethau'r Dyfodol (2015) [agorir mewn ffenestr newydd] yn gosod dyletswydd statudol ar y sector cyhoeddus i feddwl a chynllunio ar gyfer y tymor hir, i weithio'n well gyda'r bobl a'r cymunedau y maent yn eu gwasanaethu, ac i atal problemau rhag digwydd yn y lle cyntaf yn hytrach na dim ond trin y symptomau. Dyma'n union sydd ei angen wrth inni ddod allan o'r pandemig, er ei fod yn heriol i arweinwyr a gwleidyddion y sector cyhoeddus pan fo cymaint o bwysau mwy uniongyrchol.

Mae siâp newidiol y boblogaeth a drafodwyd yn sioe BBC Cymru Fyw, a ddarlledwyd ar 16 Chwefror, yn dangos pam ei bod mor bwysig ein bod yn meddwl ar gyfer y tymor hir ac yn gwneud penderfyniadau heddiw i sicrhau bod y gwasanaethau cyhoeddus y bydd eu hangen yfory yn cael eu darparu.

Gallwch ddal i fyny â chyfweliad Adrian ar wefan y BBC [agorir mewn ffenest newydd].