Mae codio clinigol yn dal i fod â phroffil isel ar lefel Byrddau, a gellid gwella trefniadau trwy fynd ati mewn modd beirniadol i archwilio lefel y buddsoddiad mewn adnoddau, gwybodaeth wreiddiol o ansawdd da ac ennyn ymgysylltiad staff meddygol â’r broses godio.

Mae codio clinigol amserol a chywir yn hanfodol i gynllunio, rheoli a goruchwylio gwasanaethau’r GIG. Yn ystod y pandemig cyfredol, bu gan godio clinigol rôl allweddol o ran goleuo penderfyniadau ynghylch pa gleifion y mae angen iddynt warchod eu hunain ac mae’n allweddol i ddeall y galw parhaus sy’n gysylltiedig â COVID-19 ar wasanaethau gofal iechyd.

Yn 2013-14 ac eto yn 2018-19, fe wnaethom archwilio trefniadau codio clinigol yn y saith bwrdd iechyd yng Nghymru ac Ymddiriedolaeth GIG Felindre, a chyhoeddi’r adroddiadau ar gyfer pob un o gyrff y GIG ar ein gwefan.

Mae’r adroddiad yr ydym yn ei gyhoeddi heddiw’n tynnu ar ein gwaith archwilio lleol i amlygu’r heriau a chyfleoedd cyfredol ar gyfer codio clinigol, gan gynnwys y potensial i ddefnyddio’r newidiadau a wnaed i ffyrdd o weithio yn ystod y pandemig i sicrhau ffyrdd newydd a mwy cynaliadwy o wneud gwaith codio.

Mae’r newid sylweddol o ran defnyddio llwyfannau digidol yn ystod y pandemig wedi creu cyfle i gyrff y GIG sicrhau bod cofnodion digidol yn cael eu defnyddio i raddau mwy helaeth, gan gynyddu gyda hynny’r cyfle i leihau’r amser a gymer i godio gweithgarwch, a rhoi cymorth ar gyfer ffyrdd mwy clyfar a hyblyg o weithio gan staff codio clinigol.

Rhai ffeithiau allweddol:

• Mae oddeutu £5.9 miliwn y flwyddyn yn cael ei wario ar broses codio clinigol y GIG ledled Cymru.
• Ar gyfartaledd, ceir tuag 1.1 miliwn o gyfnodau gofal meddygon ymgynghorol bob blwyddyn y mae angen eu codio, gyda disgwyliad y bydd tua 30 o gyfnodau gofal meddygon ymgynghorol yn cael eu codio bob ddydd gan bob codydd.
• Ar ddiwedd mis Ebrill 2020, roedd 83% o gyfnodau gofal meddygon ymgynghorol wedi cael eu codio o fewn un mis o’i gymharu â’r targed o 95% a bennwyd gan Lywodraeth Cymru.
• Canfu’r archwiliadau blynyddol o godio clinigol a gynhaliwyd gan Dîm Dosbarthiadau Clinigol y GIG yn 2019-20 lefel cywirdeb o 94%, o’i gymharu â safon a gydnabyddir yn genedlaethol o 90%.

Nodiadau i Olygyddion:

• Mae’r adroddiad hwn yn bwrw golwg ar reoli codio clinigol ledled Cymru.
• Y broses o drosi gwybodaeth feddygol sy’n disgrifio symptomau, diagnosis a thriniaeth claf yn god a gydnabyddir yn rhyngwladol ac yn genedlaethol ac y gellir ei ddefnyddio wedyn at ddibenion ystadegol a chlinigol yw codio clinigol.
• Mae gwybodaeth sy’n ymwneud â symptomau, diagnosis a thriniaeth claf yn cael ei chodio.
• Mae’r broses codio clinigol yn berthnasol i weithgarwch a thriniaeth ar ôl derbyn i ysbyty a gyflawnir mewn lleoliadau ar gyfer cleifion allanol yn unig.
• Yr Archwilydd Cyffredinol yw archwilydd allanol statudol annibynnol y sector cyhoeddus datganoledig yng Nghymru. Mae’n gyfrifol am fynd ati’n flynyddol i archwilio’r mwyafrif o’r arian cyhoeddus a gaiff ei wario yng Nghymru, gan gynnwys y £15 biliwn o arian y pleidleisir arno’n flynyddol gan Senedd Cymru. Caiff elfennau o’r cyllid hwn eu trosglwyddo gan Lywodraeth Cymru i’r GIG yng Nghymru (dros £7 biliwn) ac i lywodraeth leol (dros £4 biliwn).
• Mae annibyniaeth archwilio’r Archwilydd Cyffredinol o’r pwys mwyaf. Fe’i penodir gan y Frenhines, ac nid yw ei waith archwilio’n cael ei gyfarwyddo na’i reoli gan Senedd Cymru na’r Llywodraeth.
• Corff corfforaethol sy’n cynnwys Bwrdd statudol ac iddo naw aelod yw Swyddfa Archwilio Cymru sy’n cyflogi staff ac yn darparu adnoddau eraill ar gyfer yr Archwilydd Cyffredinol, sydd hefyd yn gweithredu fel Prif Weithredwr a Swyddog Cyfrifyddu’r Bwrdd. Mae’r Bwrdd yn monitro ac yn cynghori’r Archwilydd Cyffredinol, o ran arfer ei swyddogaethau.
• Archwilio Cymru yw’r enw ymbarél ar gyfer Archwilydd Cyffredinol Cymru a Swyddfa Archwilio Cymru. Mae Archwilio Cymru yn nod masnach cofrestredig, ond nid yw’n endid cyfreithiol ynddo’i hun.