Cefndir

Fe wnaeth Deddf Archwilio Cyhoeddus (Cymru) 2013 (‘y Ddeddf’) sefydlu Swyddfa Archwilio Cymru fel corff corfforedig sy’n gyfrifol am: 

• Ddarparu adnoddau i arfer swyddogaethau Archwilydd Cyffredinol Cymru (yr Archwilydd Cyffredinol), a
• Monitro’r modd yr arferir swyddogaethau’r Archwilydd Cyffredinol.

O dan adran 19 y Ddeddf gall Swyddfa Archwilio Cymru hefyd ddarparu gwasanaethau gweinyddol, technegol neu broffesiynol ar gyfer cyrff cyhoeddus eraill trwy gytundeb.

Pan fo Swyddfa Archwilio Cymru’n darparu seminarau a gweminarau dysgu ar y cyd a digwyddiadau eraill i gyrff a archwilir, gwneir hyn trwy gytundeb dan adran 19 y Ddeddf.

Mae Archwilio Cymru yn nod masnach i Swyddfa Archwilio Cymru a hunaniaeth ymbarél Archwilydd Cyffredinol Cymru a Swyddfa Archwilio Cymru ydyw.

Presenoldeb a Chytundeb

Mae staff cyrff a archwilir, ar ran y corff sy’n eu cyflogi, yn cytuno i gael gwasanaethau a ddarperir gan Swyddfa Archwilio Cymru trwy eu cofrestriad i fod yn bresennol yn un o ddigwyddiadau Archwilio Cymru, sy’n cyfeirio at y Cylch Gorchwyl hwn. Wrth gofrestru ar gyfer digwyddiad, mae staff yn cadarnhau eu bod wedi’u hawdurdodi i gytuno bod gwasanaeth yn cael ei ddarparu ar ran eu cyflogwr a bod ganddynt ganiatâd i fod yn bresennol.

Mae croeso hefyd i staff sefydliadau’r trydydd sector, elusennau a mentrau cymdeithasol neu gymdeithasau, a phersonau eraill â buddiant, fod yn bresennol mewn digwyddiadau lle mae digon o leoedd ar gael.

Rydym fel arfer yn darparu digwyddiadau heb gost neu am gost isel iawn i’r rhai sy’n bresennol.

Rydym yn egluro sut yr ydym yn trin data personol a ddarperir gan y rhai sy’n bresennol a chyfranwyr mewn hysbysiad prosesu teg y trefnir ei fod ar gael cyn y digwyddiad. Mae ein gwybodaeth gyffredinol am breifatrwydd ar gael ar wefan Swyddfa Archwilio Cymru.

Diben Digwyddiadau Archwilio Cymru 

Mae digwyddiadau wedi’u bwriadu i:

• hwyluso’r broses o rannu enghreifftiau o arfer da ac astudiaethau achos;
• datblygu a chymhwyso gwersi o enghreifftiau o arfer da;
• hwyluso datblygiad rhwydweithio a chydweithio cefnogol ar draws cyrff y sector cyhoeddus; a
• helpu cyrff cyhoeddus i ystyried sut i wella arferion a chreu newid.

Gall digwyddiadau fod ar ffurf

• Seminar Dysgu ar y Cyd, sy’n cyfuno cyflwyniadau gan siaradwyr allweddol a gweithdai ymarferol, a hwylusir. Bydd seminarau’n cael eu cynnal mewn dau leoliad fel arfer, y naill yn Ne Cymru a’r llall yng Ngogledd Cymru.
• Gweminar, sy’n cynnwys trafodaeth banel a hwylusir ac archwilio testun penodol gyda’r cyfle ar gyfer cyfraniadau a chwestiynau gan y gynulleidfa ar-lein.
• Digwyddiad gan Swyddfa Archwilio Cymru, megis cynhadledd ar gyfer niferoedd mwy o bobl, gyda chyflwyniadau gan siaradwyr allweddol a gweithdai a thrafodaethau a hwylusir.

Trefnu Digwyddiadau

Mae staff yn trefnu ac yn hwyluso digwyddiadau ar ran Swyddfa Archwilio Cymru, a all gynnwys cynadleddau, ymgysylltu, neu gyfarfodydd a digwyddiadau eraill, a gallant gael eu darparu’n unigol neu mewn cydweithrediad (neu ar y cyd) gyda chyrff cyhoeddus eraill a/neu sefydliadau eraill yn y sector cyhoeddus.

Efallai y byddwn yn ymgynghori â chyfranwyr allanol wrth bennu cwmpas a datblygu digwyddiadau, ac efallai y byddwn yn eu gwahodd i siarad ac ateb cwestiynau yn y digwyddiad.

Rhoddir cyhoeddusrwydd i ddigwyddiadau ar wefan Swyddfa Archwilio Cymru, trwy ei blog a’i ffrwd Twitter i gyrff a archwilir, y gall eu staff gyfranogi mewn digwyddiadau, awgrymu syniadau ar eu cyfer a chyfrannu iddynt.

Cyhoeddusrwydd a’r Cyfryngau Cymdeithasol

Mae blog a chyfrif Twitter gan Archwilio Cymru a bydd yn ysgrifennu am ddigwyddiadau cyn y digwyddiad i roi cyhoeddusrwydd iddynt ac ennyn diddordeb. Efallai y byddwn hefyd yn gwahodd cyfranwyr i ysgrifennu ar gyfer blog.

Yn ystod digwyddiadau mae’r tîm cyfathrebu’n annog y rhai sy’n bresennol a chynulleidfaoedd ar-lein i drydar cwestiynau, barn a negeseuon allweddol ac efallai y bydd yn rhannu’r rhain trwy gyfrif Twitter y Gyfnewidfa Arfer Da.