Mae ein Cynllun Blynyddol, a gyhoeddwyd ar 1 Ebrill 2020, yn nodi’r camau roeddem yn bwriadu eu cymryd yn 2020-21 tuag at gyflawni ein huchelgeisiau sefydliadol a’n hamcanion strategol. Fodd bynnag, ychydig cyn ei gyhoeddi, bu’n rhaid i ni ymateb i amgylchiadau eithriadol pandemig COVID-19.

Mae ein Hadroddiad Interim yn rhoi crynodeb o’r addasiadau a wnaed gennym i’r rhaglenni gwaith gwreiddiol a nodwyd yn ein Cynllun Blynyddol mewn ymateb i’r pandemig. Mae ein hadroddiad hefyd yn dangos y cynnydd a wnaed gennym dros y chwe mis diwethaf o ran cyflawni’r cynlluniau addasedig hyn.

Yr hyn a wnaed gennym ers mis Ebrill

Ers dechrau’r cyfyngiadau symud, rydym wedi rhoi’r gorau weithio ar safleoedd cyrff a archwilir, wedi cau ein swyddfeydd ein hunain ac wedi gofyn i’n holl staff weithio gartref. Aethom ati’n gyflym i ddatblygu sianeli cyfathrebu er mwyn sicrhau bod cydweithwyr wedi’u cysylltu o hyd a chynhaliwyd arolygon pỳls rheolaidd o’r staff er mwyn deall eu hanghenion a rhoi adborth. 

Roedd hyn yn cynnwys sicrhau mynediad o bell i systemau ariannol a datblygu trefniadau rhannu ffeiliau electronig er mwyn ei gwneud yn bosibl i’n gwaith barhau. 

Rydym ar y trywydd cywir o hyd i gyflawni ein rhaglen lawn o waith archwilio cyfrifon.

Rydym wedi ail-lunio ein rhaglenni o astudiaethau gwerth am arian, yn genedlaethol ac mewn cyrff unigol a archwilir, er mwyn cydnabod a chefnogi ymateb y sector cyhoeddus i’r pandemig.

Hefyd, gwnaethom sefydlu ein prosiect dysgu gwersi COVID-19. Gan ddefnyddio ein rhwydwaith sefydledig o gysylltiadau ym mhob rhan o’r gwasanaeth cyhoeddus, gallwn gasglu enghreifftiau o arferion da newydd ac arloesol, a’u cyfleu mewn amser real fwy neu lai.