Datblygu Map Ffordd ar gyfer Llwyddiant Parhaus

Fy rôl i fel Cyfarwyddwr Gweithredol y Gwasanaethau Archwilio yw sefydlu trefniadau i gyrraedd y safonau uchaf o ran arfer proffesiynol rhyngwladol a chreu amgylchedd y gall ansawdd archwilio ffynnu ynddo.

Yn erbyn cefnlen newidiadau sylweddol yn y ddwy flynedd ddiwethaf i’n dulliau archwilio, roeddwn wrth fy modd gyda deilliant canlyniadau adolygu ffeiliau QAD: gyda 100% o’r ffeiliau a adolygwyd yn cyrraedd ein targed ansawdd.

Mae’r canlyniad hwn yn fwy aruthrol byth pan gaiff ei ystyried ochr yn ochr â’r heriau recriwtio a chadw yr ydym wedi’u profi yn ystod y cyfnod diweddar ynghyd â’n hawydd i ddychwelyd at amserlenni archwilio cyn y pandemig.

Mewn ymateb i’r heriau recriwtio yr ydym wedi’u profi rydym wedi bod yn llwyddiannus gan mwyaf o ran ehangu ein cynlluniau hyfforddeion a phrentisiaid ac o ran recriwtio i lenwi swyddi gwag. Mae hyn wedi gosod galwadau ychwanegol arnom i roi cymorth a hyfforddiant i gydweithwyr newydd, yr ydym yn buddsoddi ynddynt, sy’n dangos sut y mae’r tair llinell sicrwydd yn gweithredu gyda’i gilydd yn effeithiol.

Mae’r cyflawniadau hyn hefyd yn amlygu ymrwymiad, ymroddiad a phroffesiynoldeb ein staff, yr wyf yn ddiolchgar iawn amdanynt.

Roeddwn hefyd wrth fy modd ein bod wedi gallu cryfhau trefniadau ein Pwyllgor Ansawdd Archwilio trwy ehangu aelodaeth y Pwyllgor (o un i dri aelod annibynnol) gydag un o aelodau annibynnol y pwyllgor (Suzanne Jones) hefyd yn ymgymryd â rôl y Cadeirydd.

Dros y flwyddyn ddiwethaf rydym wedi parhau i wneud cynnydd mewn nifer o agweddau eraill, gan gynnwys:

• sefydlu Cynllun Strategol newydd ar gyfer Gweithlu Archwilio Cymru;
• datblygu trefniadau i ddod â’n gwaith ar gyfrifon a pherfformiad lleol ymlaen;
• gwaith parhaus i wreiddio safonau ISA 315 ac INTOSAI yn llawn ac i wireddu arbedion effeithlonrwydd o roi’r safonau newydd hyn ar waith;
• gwaith parhaus i wreiddio prosesau rheoli risg ISQM 1 yn ein trefniadau yn Archwilio Cymru; a
• chynyddu’r ffocws ar ddadansoddi a deilliannau ariannol yn ein gwaith; datblygu dull gwell o gynnal adolygiadau dilynol o waith ac o gynnydd gydag argymhellion archwilio; a gwneud adroddiadau’n haws i’w darllen a sicrhau eu bod yn diwallu anghenion ein cynulleidfa.

Un o’r prif uchafbwyntiau i ni fel sefydliad yn 2024 oedd gweld cymaint o gydweithwyr yn dod ynghyd ym mis Ebrill ar gyfer ein cynhadledd staff cyfan, ‘Paratoi ar gyfer ein Dyfodol’, gyda nifer o drafodaethau bywiog a diddorol am drefn y diwydiant archwilio yn y dyfodol.

Rwy’n llwyr gefnogi a chytuno ag uchelgais Ian ac Adrian i ni fod yn sefydliad sy’n dysgu ac yn un sy’n canolbwyntio ar ddatblygu ein defnydd o dechnolegau digidol gyda chymorth gweithlu ystwyth a medrus.

I’r perwyl hwnnw rydym wedi dechrau gwaith ar ‘fap ffordd’ datblygu archwilio. Bydd y ‘map ffordd’ hwn yn dwyn ynghyd ddatblygiadau sy’n effeithio ar ein gwaith archwilio a’r ymateb y mae ei angen, gan gynnwys datblygu sgiliau a thechnoleg ddigidol yn y dyfodol; meysydd lle gallai fod angen buddsoddi; ynghyd â’n strategaeth gwireddu manteision.

Gan adeiladu ar y llwyddiannau yr wyf wedi’u hamlinellu a llwyddiannau eraill, rwy’n llwyr grediniol y bydd y ‘glasbrint’ yr ydym wrthi’n ei ddatblygu’n helpu i wireddu’r uchelgais a ddisgrifir gan Ian ac Adrian yn eu rhagair hwy: ‘Meithrin Ymddiriedaeth a Hyder Parhaus mewn Ansawdd’

Ann-Marie Harkin, Cyfarwyddwr Gweithredol y Gwasanaethau Archwilio