Ym mis Chwefror 2023, cyhoeddodd Archwilydd Cyffredinol Cymru adroddiad er budd y cyhoedd ar effeithiolrwydd y bwrdd ym Mwrdd Iechyd Prifysgol Betsi Cadwaladr, gan ddisgrifio lefel pryderus o gamweithrediad o fewn y bwrdd ac arweinyddiaeth uwch ehangach.

Rhoddwyd y Bwrdd Iechyd yn ôl mewn mesurau arbennig yr wythnos ar ôl cyhoeddi adroddiad yr Archwilydd Cyffredinol ar effeithiolrwydd y bwrdd, ac ymddiswyddodd holl aelodau annibynnol y bwrdd.

Flwyddyn yn hwyrach, mae ein hadroddiad dilynol yn cyflwyno ein canfyddiadau ar effeithiolrwydd y bwrdd cyfredol ac i ba raddau yr aethpwyd i’r afael â’r meysydd ar gyfer gweithredu ar unwaith a nodwyd yn ein hadroddiad gwreiddiol.

Ar y cyfan, canfuwyd gennym fod y bwrdd, yn dilyn cyfnod o darfu a chorddi sylweddol yn ystod 2023, mewn sefyllfa fwy sefydlog bellach, mae prif weithredwr newydd yn y swydd ac mae’r berthynas waith ymhlith arweinwyr uwch yn fwy cadarnhaol.

Fodd bynnag, mae rhai heriau sylfaenol yn parhau yng nghyd-destun sefydliad sy’n destun mesurau arbennig.